ར་ཤི་ཡའི་ དམག་སྡེ་གིས་ ཡུ་ཀེ་རེན་ རྒྱལ་ཁབ་ནང་ དྲག་བཅོམ་འབད་ཡོདཔ་ལས་ ཡུ་ཀེ་རེན་གྱི་ མི་སེར་ཚུ་ བྲོས་བྱོལ་ཐོག་ལས་ ས་འོག་གི་ རེལ་ལི་འབབ་ཚུགས་ཚུ་ནང་ སྒར་བཅགས་ཏེ་ སྡོད་དོ་ཡོདཔ་ཨིན་པས།
དེ་ཡང་ ཡུ་ཀེ་རེན་གྱི་རྒྱལ་ས་ ཀིབ་དང་ ཁར་ཀིབ་ལུ་ སྡོད་མི་ཚུ་ཨིནམ་ད་ ཁོང་ཆ་ཁྱབ་ རེལ་ལི་འབབ་ཚུགས་ཚུ་ནང་ རང་སོའི་བེག་ཚུ་གིས་ མཐའ་བསྐོར་ཏེ་ གོ་ལ་ཚུ་ ཚ་ཏོག་ཏོ་ གྱོན་ཐོག་ལས་ ཞག་ཉལཝ་ཨིན་པས་ཟེར་ གནས་ཚུལ་ཅིག་ནང་བཀོད་ནུག།
མ་གཞི་ ཡུ་ཀེ་རེན་ལུ་ ནུབ་མོར་འགྲུལ་བཀག་འབད་ཡོད་རུང་ རེལ་ལི་འབབ་ཚུགས་ཚུ་ རྫས་བམ་ལས་ ཟུར་སྡོད་ས་སྦེ་ ལག་ལེན་འཐབ་དོ་ཡོདཔ་ད་ མི་སེར་ ༡༠༠,༠༠༠ ལྷགཔ་ཅིག་ ཁྱིམ་མཚེས་རྒྱལ་ཁབ་ཚུ་ནང་ བྱོག་སོང་ནུག་ཟེར་ བཀོད་འདུག་པའི་གནས་ཚུལ།
འབྲུག་མི་ཕོ་སྐྱེས་ཅིག་ རྒྱ་གར་ལས་ ཉེན་སྐྱོབ་འབད་ཡོདཔ། ཕུན་ཚོགས་གླིང་ལུ་ བཀའ་ཁྲིམས་འགོ་དཔོན་ཚུ་གིས་ འབྲུག་མི་སྐྱེས་ལོ་༥༥ ལང་མི་ རྡོ་རྗེ་དབང་འདུས་དེ་ རྒྱ་གར་གྱི་ས་མཚམས་ཁྲོམ་སྡེ་ ཇའི་སྒང་ལས་ རྩིས་ལེན་ཡོདཔ་ཨིན་པས། རྡོ་རྗེ་དབང་འདུས་དེ་ སྐྱེས་ཡུལ་ ལྷུན་རྩེ་མཁོ་མ་ལས་ཨིན་པས། གནས་ཚུལ་གྱི་ འབྱུང་ཁུངས་ཚུ་དང་འཁྲིལཝ་ད་ རྡོ་རྗེ་དེ་ འབྲུག་ལུ་ ལོག་འོང་མ་ཚུགས་པར་ རྒྱ་གར་གྱི་ས་གནས་ མཱལ་བ་ཛར་དང་ ས་ལུ་ག་ར་ ཀ་ལིམ་སྤོང་ མང་པོ་ དར་ཇེ་གླིང་ཚུ་གི་བར་ན་ སྤྱང་འཁྱམས་ཏེ་ སྡོད་ནུག་ཟེར་ཨིན་པས། སྤྱི་ཟླ་༢ པའི་ཚེས་༢༦ ལུ་ རྡོ་རྗེ་དབང་འདུས་དེ་ བག་ར་ཀོ་ཏི་-མེསི་ཟེར་མིའི་ སྦོ་ལོགས་ཁར་ མཐོང་ཡོདཔ་བཞིན་དུ་ ཌུ་ཝརསི་ ཨེསི་པེ་རེསི་མེལ་དང་ བྱང་བེང་གཱལ་དང་ སི་ཀིམ་ལས་ སྐྱེ་བོ་ནག་ཚོང་བཀག་སྡོམ་འབད་མི་ གཞུང་མིན་ལས་སྡེ་ཅིག་དང་ ས་གནས་ཀྱི་ གནས་ཚུལ་་ལས་སྡེ་ཅིག་གིས་ འབྲུག་གི་དབང་འཛིན་ཚུ་དང་ མཉམ་འབྲེལ་ཐོག་ལས་ འབྲུག་ལུ་གཏང་ནིའི་ རྒྱབ་སྐྱོར་འབད་ཡོདཔ་ཨིན་པས། རྡོེ་རྗེ་དེ་ ད་རིས་དྲོ་པའི་ཆུ་ཚོད་༡༠.༥༠ ལུ་ འབྲུག་པའི་ས་ཁོངས་ནང་ འཛུལ་ཞུགས་འབད་ཡོདཔ་ད་ ཁོ་ར་ རྒྱལ་ཁབ་ནང་ ལོག་འོང་པའི་ ཟད་འགྲོ་ག་ར་ འབྲུག་གཞུང་གིས་ བཏང་ཡོད་པའི་གནས་ཚུལ།
Comments
Post a Comment