ཤྲཱི་ལངྐའི་རྒྱལ་ས་ ཀོ་ལོ་བོ་ལུ་ མི་སེར་ཁོང་ཁྲོ་ལང་མི་ བརྒྱ་ཕྲག་ལེ་ཤ་ཅིག་གིས་ངོ་རྒོལ།
སྤྱི་ཟླ་ ༤ པའི་ཚེས་ ༡ ལུ་ ཤྲཱི་ལངྐའི་ རྒྱལ་ཁབ་ནང་ དཔལ་འབྱོར་གྱི་ དཀའ་ངལ་ལུ་བརྟེན་ཏེ་ ཁོང་ཁྲོ་ལང་མི་ མི་སེར་བརྒྱ་ཕྲག་ལེ་ཤ་ཅིག་ ཤྲཱི་ལངྐའི་རྒྱལ་ས་ ཀོ་ལོ་བོ་ལུ་ སྲིད་འཛིན་གྱི་ གཟིམ་ཅུ་ནང་ ངོ་རྒོལ་འབད་བར་ འགྱོ་མི་ཚུ་ བཀག་ཐབས་ལུ་ སྲུང་སྐྱོབ་དམག་མི་ མང་རབས་ཅིག་ བཙུགས་ཡོདཔ་ཨིན་པས།
དེ་ཡང་ རྒྱལ་ཁབ་དེ་ནང་ ཉེ་བར་མཁོ་བའི་ ཅ་ཆས་ཚུ་ ཐོབ་མ་ཚུགས་པའི་ཁར་ གོང་ཚད་ཚུ་ཡང་ ཡར་འཕར་སྦོམ་སྦེ་ར་ སོང་ཡོདཔ་ད་ གློག་མེ་ཚུ་ཡང་ བཏོག་བཏང་མི་དེ་ སྤྱི་ལོ་ ༡༩༤༨ ལུ་ རྒྱལ་ཁབ་དེ་ རང་དབང་ཐོབ་ཞིནམ་ལས་ཚུར་ དེ་བཟུམ་མའི་ དཀའ་ངལ་སྦོམ་ཐོན་མི་ཚུ་ འགོ་དང་པ་ཨིནམ་ལས་ སྲིད་འཛིན་དེ་ དགོངས་ཞུ་འབད་དགོ་པའི་ མཁོ་འདོད་བཀོད་དེ་ ངོ་རྒོལ་འབད་ནུག།
དེ་སྦེ་ ངོ་རྒོལ་འབད་མི་ཚུ་གིས་ དམག་སྡེའི་སྣུམ་འཁོར་བཱཛ་ ༢ དང་ ཁྲིམས་སྲུང་འགག་སྡེའི་ སྣུམ་འཁོར་ཇིབ་ཅིག་ལུ་ མེ་སྤར་ཡོདཔ་མ་ཚད་ འགོ་དཔོན་ཚུ་ལུ་ ས་པག་ཅུང་ཚུ་ཡང་ བཀོག་ཐོག་ལས་ ངོ་རྒོལ་འབད་ནུག་ཟེར་ བཀོད་འདུག་པའི་གནས་ཚུལ,
འབྲུག་མི་ཕོ་སྐྱེས་ཅིག་ རྒྱ་གར་ལས་ ཉེན་སྐྱོབ་འབད་ཡོདཔ། ཕུན་ཚོགས་གླིང་ལུ་ བཀའ་ཁྲིམས་འགོ་དཔོན་ཚུ་གིས་ འབྲུག་མི་སྐྱེས་ལོ་༥༥ ལང་མི་ རྡོ་རྗེ་དབང་འདུས་དེ་ རྒྱ་གར་གྱི་ས་མཚམས་ཁྲོམ་སྡེ་ ཇའི་སྒང་ལས་ རྩིས་ལེན་ཡོདཔ་ཨིན་པས། རྡོ་རྗེ་དབང་འདུས་དེ་ སྐྱེས་ཡུལ་ ལྷུན་རྩེ་མཁོ་མ་ལས་ཨིན་པས། གནས་ཚུལ་གྱི་ འབྱུང་ཁུངས་ཚུ་དང་འཁྲིལཝ་ད་ རྡོ་རྗེ་དེ་ འབྲུག་ལུ་ ལོག་འོང་མ་ཚུགས་པར་ རྒྱ་གར་གྱི་ས་གནས་ མཱལ་བ་ཛར་དང་ ས་ལུ་ག་ར་ ཀ་ལིམ་སྤོང་ མང་པོ་ དར་ཇེ་གླིང་ཚུ་གི་བར་ན་ སྤྱང་འཁྱམས་ཏེ་ སྡོད་ནུག་ཟེར་ཨིན་པས། སྤྱི་ཟླ་༢ པའི་ཚེས་༢༦ ལུ་ རྡོ་རྗེ་དབང་འདུས་དེ་ བག་ར་ཀོ་ཏི་-མེསི་ཟེར་མིའི་ སྦོ་ལོགས་ཁར་ མཐོང་ཡོདཔ་བཞིན་དུ་ ཌུ་ཝརསི་ ཨེསི་པེ་རེསི་མེལ་དང་ བྱང་བེང་གཱལ་དང་ སི་ཀིམ་ལས་ སྐྱེ་བོ་ནག་ཚོང་བཀག་སྡོམ་འབད་མི་ གཞུང་མིན་ལས་སྡེ་ཅིག་དང་ ས་གནས་ཀྱི་ གནས་ཚུལ་་ལས་སྡེ་ཅིག་གིས་ འབྲུག་གི་དབང་འཛིན་ཚུ་དང་ མཉམ་འབྲེལ་ཐོག་ལས་ འབྲུག་ལུ་གཏང་ནིའི་ རྒྱབ་སྐྱོར་འབད་ཡོདཔ་ཨིན་པས། རྡོེ་རྗེ་དེ་ ད་རིས་དྲོ་པའི་ཆུ་ཚོད་༡༠.༥༠ ལུ་ འབྲུག་པའི་ས་ཁོངས་ནང་ འཛུལ་ཞུགས་འབད་ཡོདཔ་ད་ ཁོ་ར་ རྒྱལ་ཁབ་ནང་ ལོག་འོང་པའི་ ཟད་འགྲོ་ག་ར་ འབྲུག་གཞུང་གིས་ བཏང་ཡོད་པའི་གནས་ཚུལ།
Comments
Post a Comment